कोरोना संक्रमण : आज पनि एक अंकमा सीमित, बालबालिकामा संक्रमण छैन, २१ जनाले कोरोना जिते र निधन शुन्य

अन्तरङ्ग सम्वाददाता

बेसीशहर– लमजुङमा कोरोना भाइरस(कोभिड– १९) बाट संक्रमित हुने संख्या आज पनि एक अंकमा सीमित भएको छ । हिजो मात्र एक जनामा संक्रमण पुष्टि भएकोमा आज त्यो बढेर ७ जनामा संक्रमण भएको जिल्ला प्रशासन कार्यालयले जारी गरेको विज्ञप्तिमा उल्लेख छ । 

        सो विज्ञप्ति अनुसार आज साउन ४ गते ७ जनामा मात्र संक्रमण पुष्टि भएको हो । आज कोरोना जित्नेको संख्यामा २१ जना थप भएको छ भने कोरोनाका कारण कसैको पनि निधन भएको छैन । आजको दिनमा बालबालिका पनि संक्रमित भएका छैनन् । 

        आज थप भएको संख्या समेत जिल्लामा कोरोना संक्रमित हुनेहरू कुल दुई हजार १३६ पुगेको छ । हालसम्म कोरोना जित्नेको संख्या एक हजार ९८३ पुगेको छ । सक्रिय संक्रमितको संख्या ११९ जनामा कायम छ ।

        आज बेसीशहर नगरपालिकाका ३ जना सुन्दरबजार नगरपालिकाका २ जना तथा मर्स्याङ्दी गाउँपालिका– ६ का ४६ वर्षका पुरुष तथा मनाङमा स्थायी बसोबास भई लमजुङ बस्ने वर्ष ३८ का पुरुष समेत संक्रमित भएका   छन् । 

        आज बेसीशहर नगरपालिका– २ का ७७ वर्षीया महिला, वडानं– ३ का ४५ वर्षीया महिला र वडानं– ११ का ४८ वर्षीय महिलामा संक्रमण पुष्टि भएको छ ।

        त्यस्तै, सुन्दरबजार नगरपालिका– ९ का ४६ वर्षीया महिला र ४९ वर्षका पुरुषमा पनि संक्रमण फेला परेको जिल्ला प्रशासन कार्यालयका प्रशासकीय अधिकृत जगदिश मिश्रले दस्तखत गर्नु भएको विज्ञप्तिमा उल्लेख गरिएको छ । उहाँका अनुसार जिल्लाका कुल संक्रिया संक्रमित संख्या ११९ जना रहेका छन् ।