पाउँदी बजारको मर्स्याङ्दी नदी किनारमा रहेको सिद्धेश्वर मन्दिर हेर्दाहेर्दै आँखाकै साम्ने बाढीले बगायो

विष्णुकुमार श्रेष्ठ/ब्युरोप्रमुख अन्तरङ्ग

पाउँदी(लमजुङ)– हिजोदेखि परेको अबिरल बर्षाले लमजुङको प्रवेशद्वार पाउँदीबजारको नजिक मर्स्याङ्दी नदी किनारमा रहेको सिद्धेश्वर मन्दिर सो नदीमा आएको बाढीले बगाएको छ । सुन्दरबजार नगरपालिका– ७ को पाउँदी बजारस्थित मर्स्याङ्दी नदी किनारमा रहेको शिव मन्दिर बाढीले असार १ गते करिब पाँच बजेको समयमा बगाएको हो ।

        उक्त मन्दिर २०४० सालमा सुन्दरबजार निवासी तत्कालीन प्रतिष्ठित व्यापारी स्व. कृष्णलाल श्रेष्ठले एकल खर्चमा निर्माण गरिदिनु भएको उक्त मन्दिरका पुजारी विष्णुहरी गौलीले बताउनु भयो । उहाँका अनुसार आफ्ना बुबा स्व. विष्णुप्रसाद गौलीलाई सपनामा ‘महादेवले दर्शन दिएर म यहाँ बसेको छु कसैले वास्ता गरेनन्, तिमीले बिहान, साँझ पुजा गर्नु’ भन्ने आदेश भएपछि २०३८ सालदेखि आफ्ना बुवाले नियमित पुजा गर्नु भएको हो । उहाँले भन्नुभयो, ‘बुवाले २५ वर्षसम्म त्यो काम गर्नु भयो । उहाँ ८५ वर्षको उमेरमा स्वर्गे हुनुभएको हो, बुवाको शेषपछि मैले पुजारीको काम गर्न लागेको पनि २० वर्ष भयो ।’ 

        सो मन्दिरको गुठीका नाउँमा १२ रोपनी जग्गा २०४२ सालको नापीमा रहेको छ तर पछि पुल र विद्युत टावर निर्माण गरिदा एक रोपनी जति काटिएको छ । त्यसमै तरकारी आदि खेती गरेर आफूले खाने गरेको पुजारी गौलीले बताउनु भयो । उहाँका अनुसार उक्त मन्दिरमा पुजा गरेवापतमा भक्तजनले दिने भेटी चामल आदि बाहेक अन्यत्रबाट आजका दिनसम्म केही पाएको छैन तर पनि बुबाले गर्नु भएको काम भएको हुँदा छाड्न मन लाग्दैन । उक्त मन्दिरमा ठूली एकादशी र वालाचतुर्दशीका साथै शिवरात्रीमा पनि भक्तजनहरू दर्शन र पुजाका लागि आउने गरेको पुजारी गौलीले बताउनु भयो । 

        लाखौं भक्तजनहरूको आस्थाको केन्द्रका रुपमा रहेको उक्त पवित्र शिव मन्दिर बगाउँदा अत्यन्तै चिन्तित भएको सो वडाका अध्यक्ष जयराम रेग्मीले बताउनु भयो । त्यसैगरी, धार्मिक एवम् पर्यटकीय महत्त्व बोकेको यो शिवालय मन्दिर बगाउँदा अत्यन्तै पीडा भएको सुन्दरबजार नगर कार्यपालिकाका सदस्य लक्ष्मी पोख्रेलले बताउनु भयो । उहाँका अनुसार शिवालय मन्दिरमा ठूलो एकादशी, महा शिवरात्रीका साथै सदबीज छर्ने तिथिमा लाखांै धर्मावलम्बीले पुजा पाठ गर्न आउने गर्दछन् ।

        हिजोदेखि परेको पानीबाट मस्र्याङ्दी नदीमा आएको बाढीले मन्दिर वगाएको स्थानीय समाजसेवी भूमिनन्द तिमिल्सिनाले बताउनु भयो । उहाँका अनुसार विहान मन्दिरको आधा जसो भाग बाढीले डुबाएको थियो । लग्छ कि क्या हो भन्ने लागेको थियो । उहाँले भन्नुभयो, ‘दिउँसो ४ बजेतिर जाँदा मन्दिरको छानामात्र देखियो । म आधा घण्टा बसेर फर्के, त्यसको आधा घण्टाजतिमा मन्दिर बगाएछ ।’ सो मन्दिर नदी किनारबाट करिब ७ मिटर माथि थियो । उहाँले भन्नुभयो, ‘त्यो मन्दिरको भित्र नाग आकारको स्वनिर्मित मूर्ति छ । एउटा खोपिल्टोमा आफै पानी निस्कने गर्दछ भन्थे, हिजोआज त पानी देखिदैनथ्यो ।’

        ‘उक्त मन्दिरलाई पानीले डुवाएको मात्र हो कि ? बगाएरै लगेको होला ?’ भन्ने हाम्रो जिज्ञासामा ‘मन्दिरको छाना केही तलसम्म बगाएर लगेको आफ्नै आँखाले देखेको’ पुजारी गौलीले बताउनु भयो । उहाँले भन्नुभयो, ‘शुरुमा ३ बजेतिर दुईवटा हाँगा आएर मन्दिरमा अड्किएर बसेका थिए, पछि ठूलो रुख ल्यायो, त्यो रुख केही क्षण त्यो मन्दिर छेउमा अडियो त्यसपछि रुख र मन्दिरसँगै हेर्दाहेर्दै आँखाकै साम्ने बगेको देखें, नरमाइलो लाग्यो र म      फर्के ।’