निषेधाज्ञा एकसाता लम्बिएसँगै बैंकमा सेवाग्राहीको भिड, प्रशासनको निर्देशन फित्तलो सावित

अन्तरङ्ग सम्वाददाता

बेसीशहर– लमजुङमा कोरोना भाइरस(कोभिड– १९) को दोस्रो प्रकोपका क्रममा पुनः एकसाताका लागि निषेधाज्ञा थप भएपछि बैंकमा सेवाग्राहीको भिड लागेको छ । निधेषाज्ञामा सातामा दुईदिन आइतबार र बिहीबार मात्र र ती दिनमा पनि १० बजेदेखि १२ बजेसम्म मात्र बैंक खुल्न पाउने निर्देशन जारी भएपछि राष्ट्रिय बाणिज्य बैंकको बेसीशहर शाखामा जेठ १७ गते सेवाग्राहीको भिड लागेको हो ।  

        प्रमुख जिल्ला अधिकारी होमप्रसाद लुईटेलले दस्तखत गरी जारी गरेको विज्ञप्तिमा निधेषाज्ञा असार ३ गतेसम्म थप भएको उल्लेख छ । सो विज्ञप्तिमा पनि विगतका दिनजस्तै सातामा दुईदिन आइतबार र बिहीबार मात्र त्यो पनि १० बजेदेखि १२ बजेसम्म मात्र बैंक खुल्न पाउने भनिएपछि बैंकमा सेवाग्राहीको भिड लागेको छ । उक्त भिडले जिल्ला प्रशासनको निर्देशनलाई फित्तलो सावित गरिदिएको छ । 

        जेठ २६ गते आठ जना बालबालिकासँगै ७६ जना नयाँ संक्रमित थपिएसँगै जिल्ला प्रशासन कार्यालयले निधोषाधा असार ३ गतेसम्मका लागि थप गरेको हो । यसअघि चौथोपटक थप भई जारी गरिएको निषेधाज्ञा जेठ २७ गते राती १२ बजेसम्मका लागि थियो । अब यो अवधि असार ३ सम्मका लागि लम्बिन गएको छ । 

        अघिल्ला तीन दिन क्रमशः ओह्रालो लागेको संक्रमित संख्या चौथो दिन अर्थात जेठ २६ गते ह्वात्तै बढेर ७६ पुगेको हो । २५ गते १२ जनामा मात्र संक्रमण भएका थिए । त्यस्तै, २४ गते ३४ जना संक्रमित फेला परेका थिए भने जेठ २३ गते ५७ जनामा संक्रमण पुष्टि भएको थियो । २६ गतेका दिन १२ जनामा मात्र संक्रमण भएको खबरले उत्साहित भएका जिल्लाबासीहरू २७ गतेको खबरले फेरि स्तब्ध भएका छन् । बेसीशहर नगरपालिका– ८ का लक्ष्मी पौडेलले हिजोअस्तिका तीन दिनको रिपोर्टले उत्साहित बनाएको थियो आज २६ गतेको खबरले फेरि झसङ बनाएको बताउनु भयो । 

        स्मरणीय छ, लमजुङमा बुधबारसम्म कुल संक्रमित संख्या एक हजार चार सय ६१ पुगेको छ । अहिले जिल्लामा सक्रिय संक्रमित संख्या ६९६ रहेको जिल्ला प्रशासनले जनाएको छ । संक्रमित भएका मध्ये २२ जनाको दुःखद निधन भएको छ भने ७३४ जनाले कोरोना जितेका छन् ।