मनाङमा एकै दिन २३ जनाले जिते कोरोना, ६८ प्रतिशत निको, ११ प्रतिशत जनसंख्यामा स्वाव परीक्षण

 अन्तरङ्ग सम्वाददाता

चामे(मनाङ)– हिमाल पारीको जिल्लाको उपमा पाएको मनाङमा कोरोना भाइरस(कोभिड– १९)को दोस्रो प्रकोपका कारण संक्रमित भएका मध्ये कोरोनालाई जित्नेको संख्या पनि बढ्दै गएको छ । जिल्लामा एकै दिन जेठ ९ गते २३ जनाले कोरोना जितेका छन् । कुल निको हुने संख्या ३८ जना अर्थात ६८ प्रतिशत रहेको छ । 

कोरोना भाइरसको नयाँ भेरियन्टसहितको दोस्रो प्रकोपका क्रममा मनाङमा कुल संक्रमित ६६ जना पुगेका छन् । यो संख्या गत वर्ष १० मात्र थियो । यो वर्षका संक्रमित तीमध्ये २३ महिला र पुरुष संख्या ३४ जना रहेका छन् । तीमध्ये बालिका ३ जना र बालक ६ जना गरी ६६ जना संक्रमित भएको स्वास्थ्य कार्यालय मनाङका जनस्वास्थ्य अधिकृति एवम् कोरोनाका फोकल पर्सन सुदीप खत्रीले बताउनु भयो । उहाँका अनुसार कोरोना जित्ने ९ महिला र २४ पुरुष छन् भने एक बालक र ४ बालिका रहेका छन् । उहाँले भन्नुभयो, ‘जिल्लामा यतिबेला २८ जना सक्रिय संक्रमित रहेका छन् ।’ संक्रमित मध्ये ३८ जनाले कोरोनालाई जितेको र निको हुने ६८ प्रतिशत रहेको खत्रीले जानकारी दिनुभयो । 

संक्रमितमध्ये धेरैजसो होम आइसोलेशनमा बसेको स्वास्थ्य कार्यालय मनाङले जनाएको छ । जनस्वास्थ्य अधिकृति खत्रीले भन्नुभयो, ‘जिल्लामा कुल ११ प्रतिशतको कोरोना परीक्षण गरिएको छ । परीक्षण गरिएका मध्ये १३ प्रतिशतमा संक्रमण पुष्टि भएको छ ।’ उपचारको क्रममा दुईजनालाई जेठ १० गते पोखरा रिफर गरिएको छ । ४ जना संस्थागत आइसोलेसनमा छन् भने अन्य संक्रमित २२ जना होम आइसोलेसनमा रहेको जनस्वास्थ्य अधिकृति खत्रीले उल्लेख गर्नु भयो । उहाँका अनुसार मनाङमा पहिलोचरणको प्राथमिकतामा परेरका सुरक्षाकर्मी, स्वास्थ्यकर्मी आदि छुटेकाहरूका लागि भोलि जेठ ११ गतेदेखि खोप लाउने तयारी समेत गरिएको छ । 

हालसम्ममा जिल्ला स्थित सामुदायिक आइसोलेशनमा छ जना संक्रमित रहेको स्वास्थ्य कार्यालयका प्रमुख बद्री आचार्यले बताउनु भयो । उहाँका अनुसार मनाङका चार स्थानीय तहमध्ये संक्रमितहरू दुई वटा पालिकामा मात्र रहेका छन् । उहाँले भन्नुभयो, ‘दोस्रो लहरको कोरोना संक्रमणबाट सदरमुकाम रहेको चामे गाउँपालिका र मनाङ ङिस्याङ गाउँपालिकामा बढी प्रभाव पारेको छ ।’ नासों गाउँपालिका र नार्पाभूमि गाउँपालिकामा संक्रमितको संख्या शून्य रहेको छ । 

हाल मनाङमा संक्रमित थपिने क्रम न्यून हुँदै गएको आचार्यले बताउनु भयो । उहाँले भन्नुभयो, ‘जिल्लाको सामुदायिक आइसोलेशन र होम आइसोलशनमा रहेका सबै संक्रमितहरूको स्वास्थ्य अवस्था सामान्य छ ।’ 

मनाङमा ठूलो सानो गरी २९ अक्सिजन सिलिण्डर छन् । तीमध्ये ११ वटा अक्सिजन सिलिण्डर खपत भइसकेको स्वास्थ्य कार्यालय मनाङले जनाएको छ । 

चामे गाउँपालिकामा दुई वटा अक्सिजन कन्सन्टे«टर र दुई वटा साना अक्सिजन सिलिण्डर स्वास्थ्य कार्यालय प्रमुख आचार्यले बताउनु भयो । यहाँका अनुसार मनाङ ङिस्याङ गाउँपालिकामा तीन अक्सिजन कन्सन्टे«टर र १३ वटा साना सिलिण्डर रहेकोमा नौ वटा अक्सिजन सिलिण्डर खपत भइसकेको छ । उहाँले भन्नुभयो, ‘नार्फु गाउँपालिकामा अक्सिजन सिलिण्डर छैन तर अक्सिजन कन्सन्टे«टर पाँच थान छन् ।’ त्यसैगरी, नासो गाउँपालिकामा दुई वटा अक्सिजन कन्सन्टे«टर र एक सानो अक्सिजन सिलिण्डर रहेको आचार्य बताउनु हुन्छ । उहाँका अनुसार यहाँ हाइअल्टिच्युड हुने भएकाले अक्सिजन कम भएको अवस्थामा उपयोग गर्न यहाँका मानिसले प्रायः अक्सिजनको व्यवस्थापन गरेका हुन्छन् । उहाँले भन्नुभयो, ‘मनाङ हिमाली क्षेत्र भएकाले यहाँका प्रत्येक होटल तथा बेसक्याम्पमा अक्सिजन राख्ने गरिएको छ ।’ 

मनाङ जिल्लामा कुल ४७ शय्याको आइसोलेशन छ । तीमध्ये सदरमुकाम रहेको चामे गाउँपालिकामा १०, जिल्ला अस्पताल मनाङमा सात, मनाङ ङिस्याङ गाउँपाकिलामा १३, नासो गाउँपालिकामा १२ र नार्फु गाउँपालिकामा पाँचवटा आइसोसन रहेका छन् जनस्वास्थ्य अधिकृत खत्रीले जानकारी दिनुभयो ।