अन्तरङ्ग पढ्ने संख्या डेढ लाख नाघ्यो

अन्तरङ्ग संवाददाता

लमजुङ– लमजुङको जेठो पत्रिका अन्तरङ्ग परिवारद्वारा सञ्चालन गरिएको www.antaranganews.com (ब्लग)मा समाचार हर्ने संख्या डेढ लाख नाघेको छ । यो समाचार तयार गर्दै गर्दा बैशाख ३० गते मध्यान्ह २.३० बजेको समयमा www.antaranganews.com पढ्ने संख्या एक लाख ५०हजार २३१ पुगेको हो । 

यसअघि गत फागुन १३ गतेका दिन साँझ ६ बजे अन्तरङ्गको उक्त ब्लग हेर्ने संख्या एक लाख पुगेको थियो । उक्त ब्लगलाई आजको दिनमा ९५९ जनाले हेरेका छन् भने हिजो बैशाख २९ गतेका दिन ४ हजार १४८ जनाले हेरेका थिए । यसैगरी, गत महिनामा १५ हजार २७१ पटक पढिएको अन्तरङ्ग यो ब्लग बैशाख महिनाको अहिलेको अवधिसम्म १९ हजार ९४५ पटक पढिएको छ । 

लमजुङमा २०४९ सालदेखि प्रकाशन हुँदै आएको अन्तरङ्गले एक वर्ष अघिदेखि आधिकारिक रुपमा ब्लगको सञ्चालन गर्न थालेको हो । यसको सूचना विभागमा अनलाइन दर्ताको प्रक्रिया पनि शुरु भएको छ । कोरोनाको दोस्रो प्रकोप शुरु भएका कारण भएको बन्दबन्दीले सो कार्य प्रभावित भएको हो । 

अन्तरङ्ग आफ्नै जिल्ला अर्थात लमजुङमा बसेर पत्रकारिता गर्नु पर्छ भन्ने अवधारणको विकास गराउन चाहनु हुने र सो कार्यलाई व्यवहारमै गरी देखाउनु हुने वरिष्ठ पत्रकार नवराज पहाडीले शुरुका दिनदेखि नै सम्पादन तथा प्रकाशन गर्दै आउनु भएको छ । 

२०४९ सालमा द्वैमासिकका रुपमा दर्ता भएको अन्तरङ्ग एक वर्षपछि पाक्षिक भएको थियो र पाक्षिक प्रकाशनको सात वर्षपछि साप्ताहिकमा परिवर्तन भएको हो । साप्ताहिक रुपमा प्रकाशन हुन थालेपछि हरेक विहीबारका दिनमा प्रकाशन हुँदै आएको छ । अन्तरङ्ग पछिल्ला पाँच वर्षदेखि क वर्गमा वर्गीकृत हुँदै आएको छ । 

पठाक वर्गलाई थाहै छ, अन्तरङ्ग वस्तुनिष्ठ पत्रिकाका रुपमा स्थापित छ ।