अन्तरङ्ग संवाददाता
खुदी(लमजुङ)– लमजुङको पर्यटकीय सिउरुङ गाउँकी एक महिला भालुको आक्रमणबाट गम्भीर घाइते भएकी छिन् । जिल्लाको उत्तरी क्षेत्रमा रहेको मस्र्याङ्दी गाउँपालिका– ३ को सिउरुङ गाउँकी ४५ वर्षीया आइतकुमारी गुरुङ बैशाख ३० गते दिउँसो जंगलमा घाँस काट्ने क्रममा भालुको आक्रमणबाट घाइते हुनुभएको हो ।
आइतकुमारी सिउरुङ गाउँभन्दा माथि च्याल्दो जंगलमा घाँस काट्न जानु भएको थियो । एक्लै जंगलमा घाँस काट्ने क्रममा आमालाई भालुले आक्रमण गरेको आइतकुमारीका छोरा तुलराज गुरुङले बताउनु भयो । घाइते महिलाको उपचारका लागि खुदी स्वास्थ्य चौकी ल्याएकोमा त्यहाँ प्रार्थमिक उपचार गरी जिल्ला अस्पतालमा रिफर गरिएको खुदी स्वास्थ्य चौकीका अनमी खुशीमाया गुरुङले जानकारी दिनुभयो । घाइते महिला स्थानीय लताकुञ्ज आधारभूत विद्यालयमा कार्यालय सहायक रहेको सो विद्यालयका प्रधानाध्यापक उमर गुरुङले बताउनु भयो ।
घाइते महिलाको अवस्था गम्भीर रहेको जिल्ला अस्पतालका प्रमुख हेमन्त श्रेष्ठले बताउनु भयो । उहाँका अनुसार घाइते महिलाको अनुहारमा आँखाको नजिक भागमा, देब्रे पाखुरा र छातीमा समेत ठूलै चोट रहेको छ । उहाँले भन्नुभयो, ‘ती महिलाको शरीरबाट धेरै रगत बगेको छ त्यसैले थप उपचारका लागि पोखरा रिफर गरिएको छ ।’
No comments:
Post a Comment