हिमाली जिल्ला मनाङमा पनि फैलियो कोभिड : आजै २८ जनामा संक्रमण पुष्टि, संक्रमित हुनेमा एक विदेशी नगरिक समेत कुल संख्या ४२ पुग्यो, कोभिडबारे सचेतना जगाउन सशस्त्र प्रहरी गाउँगाउँमा

अन्तरङ्ग संवाददाता

चामे– हिमाल पारीको जिल्लाको उपमा पाएको मनाङमा समेत कोरोना भाइरस(कोभिड– १९) को दोस्रो प्रकोपको संक्रमण फैलिन थालेको छ । मनाङमा २८ जनामा कोरोना संक्रमण बैशाख २८ गते पुष्टि भएको हो । संक्रमित हुनेमा एक विदेशी नगरिक समेत रहेको र जिल्लामा कुल संक्रमितको संख्या ४२ पुगेको छ । 

यतिबेला मनाङ जिल्ला अस्पतालको आइसोलेसनमा एकजना महिला र पुरुष संक्रमितको उपचार भइरहेको छ । एक जना माथिल्लो मनाङ घर भएका ८४ वर्षका बृद्ध थप उपचारका लागि काठमाडौं रिफर गरिएको जिल्ला स्वास्थ्य कार्यालयका प्रमुख डा. बद्री आचार्यले बताउनु भयो । उहाँका अनुसार एक महिला र पुरुष जिल्ला अस्पतालको आइसोलेसनमा उपचाररत छन् । अन्य संक्रमितहरू आफ्नै घरको आइसोलेसनमा रहेका छन् । उहाँले भन्नुभयो, ‘हाल जिल्लाभर कोरोना संक्रमितको संख्या ४२ पुगेको छ । आज पुष्टि भएका संक्रमितमध्ये एक जना १६ वर्षकी बालिका, एक विदेशी नगरिक, १० जना महिला र १७ जना पुरुष रहेका छन् । उनीहरू ४ जना जिल्ला सदरमुकाम रहेको चामे गाउँपालिकाका हुने भने अन्य सबै निस्याङ गाउँपालिकाका हुन् ।’ 

संक्रमित मध्ये एक जना ३९ वर्षका नेदरल्याणका नागरिक समेत रहेको र उनी माथिल्लो मनाङको एक होटलमा सुरक्षित रहेको र उनीलाई निगरानी गर्न सम्बन्धित वडाध्यक्षलाई अनुरोध गरिएको जिल्ला अस्पताल मनाङका जनस्वास्थ्य अधिकृत सुदीप खत्रीले बताउनु भयो । उहाँका अनुसार चामे गाउँपालिकाका २९ वर्षका दुई पुरुष तथा ३९ र ५५ वर्षका महिला छन् । अन्य संक्रमित सबै निस्याङ गाउँपालिकाका हुन् । उनीहरूको उमेर क्रमशः १७, १९, ३३ वर्षका दुईजना, ४६, ४७, ५३ र ६९ वर्षीया महिला छन् । त्यस्तै, संक्रमित पुरुषहरूको उमेर २१, २८, २९, ३१, ३२ र ३३ वर्षका २/२ जना, ३५, ४५, ५९ र ६६ वर्ष रहेको जनस्वास्थ्य अधिकृत खत्रीले जानकारी दिनुभयो । 

यसैबीच, मनाङमा कोरोना संक्रमितको संख्या बढ्न थालेपछि चामे गाउँपालिकाले १० शैयाको अस्थायी आइसोलेसन कक्ष निर्माण गरेको छ । सो गाउँपालिकामा ४ जनामा संक्रमण देखिएपछि उसले बैशाख २१ गते सो कार्य गरेको हो । अहिले चामे गाउँपालिकामै संक्रमितको संख्या ११ पुगिसकेको छ । तर, अघिकांश संक्रमित होम आइसोसेलनमा रहेका छन् ।

 गाउँपालिकामा रहेको कबर्डहल प्रयोग गरेर गाउँपालिकाले आइसोलेसन कक्ष निर्माणका लागि गाउँपालिकाले आफ्नै लगानीमा १० शैयाको अस्थायी अस्पताल बनाएको गाउँपालिकाका प्रमुख प्रशासकीय अधिकृत नरबहादुर चन्दले बताउनु भयो । उहाँका अनुसार गण्डकी प्रदेश सरकारले उपलव्ध गराएको भेन्टिलेटर जनशक्ति अभावमा सञ्चालनमा नआएको भन्दै गाउँपालिकाले भेन्टिलेटर सञ्चालनको तयारी समेत थालेको छ । उहाँले भन्नुभयो, ‘गाउँपालिका अध्यक्ष लोकेन्द्र घलेको अध्यक्षतामा बसेको स्थानीय कोभिड व्यवस्थापन समितिको वैटकले सो निर्णय गरेको हो । साथै, संक्रमितहरूको थप उपचारमा सहयोग गर्न रेडक्रससँग सहकार्य गरेर निःशुल्क एम्बुलेन्स सेवा सञ्चालन गर्ने निर्णय गरेको छ ।’

जिल्लामा एमडिजिडिपी गरेका डाक्टरको अभावमा थन्किएका भेण्टिलेटर र अक्सिजन सञ्चालनका लागि करारमा चिकित्सक नियुक्ति गर्ने प्रक्रिया अघि बढाइएको चन्दले जानकारी दिनुभयो । 

यसैगरी, कोरोना भाइरस(कोभिड– १९)को दोस्रो प्रकोप फैलिन थालेसँगै त्यसको नियन्त्रण तथा रोकथामका लागि सशस्त्र प्रहरी पनि सक्रिया हुन थालेको छ । मनाङमा  १४ जना सङ्क्रमित देखिँदै गर्दा जिल्लावासीलाई  आषधि र मास्कसहित नासों गाउँपालिका– ६, ७  तिल्चे गाउँ  वडानं– ८ को ताचै गाउँ र वडानं ४को ओडार गाउँमा पुगेर सर्वसाधारणलाई मास्क वितरण गर्दै यसको प्रगोग गर्न विधि सिकाउन सशस्त्र प्रहरी गाउँगाउँमा पुगेको हो । उक्त कार्यका लागि मनाङमा रहेको सशस्त्र प्रहरी बल ३२ नम्बर गुल्मका गुल्मपती डिएसपी होमनाथ पन्थीको नेतृत्वमा ७ जना जवानहरू गाउँगाउँमा पुगेर कोरोना भाइरससँग कसरी बाँच्ने भन्नेबारेमा सचेतना जगाउने काम गरिआएका छन् ।