संक्रमित ८५.५ प्रतिशत कोरोना जिते

विष्णुकुमार श्रेष्ठ  ब्युरोप्रमुख, अन्तरङ्ग 

लमजुङ । लमजुङमा कोरोना भाइरस (कोभिड– १९) संक्रमितमध्ये ८५.५ प्रतिशतले कोरोना जितेर मुक्त भएका छन । आज असोज १८ गते नेपाली सेनाको आइसोलेसनमा रहेका ६ जनाले समेत कोरोना जितेपछि उक्त संख्यामा बढोत्तरी भएको हो । 

आज कोरोना जित्ने छ जना सहित हालसम्म कोरोना जित्नेको कुल संख्या जिल्लामा ३४१ जना भएको जिल्ला प्रसासन कार्यलय लमजुङका सूचना अधिकारी एवम् सहायक प्रमुख जिल्ला अधिकारी काजीमान सुनारले बताउनु भयो । उहाँका अनुसार कोरोना जित्नेमा ७५ महिला र २६६ पुरुष हुनुहुन्छ । 

यसैबीच, लमजुङमा आइसोलेसनमा रहेको संख्या हाल ५८ जना छन् । तीमध्ये १४ जना महिला र ४४ जना पुरुष रहेको जिल्ला प्रशासन कार्यालयको भनाई छ । सो कार्यालयका अनुसार संक्रमित सबैको अवस्था सामान्य छ ।