लमजुङको उदिपुरमा बस दुर्घटना : एकको मृत्यु, तीन जना घाइते

अन्तरङ्ग संवाददाता

बेसीशहर– लमजुङको उदिपुरमा एक बस दुर्घटनाग्रस्त भएको छ । असोज १७ गते साँझ ७ः४५ बजे भएको बस दुर्घटनामा एक जनाको निधन हुनुका साथै तीन जना यात्रु घाइते भएको प्रहरीले जनाएको छ । दुईको अवस्था गम्भिर भएको हुँदा पोखरा रिफर गरिएको जिल्ला अस्पतालले जनाएको छ । 

ग १ ख ६५०१ नम्बरको यात्रु बाहक बस जिल्ला सदरमुकाम बेसीहरबाट यात्रु लिएर लमजुङको सुन्दरबजार नगरपालिकाको खत्रीठाँटीका लागि छुटेको थियो । यात्राका क्रममा बेसीशहर नगरपालिका– १ उदिपुरमा दुर्घटना ग्रस्त भएको प्रहरीले बताएको छ । प्रहरीका अनुसार बेलुका ७ः४५ बजे दुर्घटनामा भएको हो । सो घट्नामा चार जना घाइते भएकोमा एक जनाको जिल्ला सामुदायिक अस्पतालमा उपचारका लागि लग्नासाथ चिकित्सकले मृत घोषित गरेको सो अस्पतालका प्रमुख हेमन्त श्रेष्ठले बताउनु भयो । उहाँका अनुसार मृतक २६ वर्षीय अर्जुन परियार हुन् ।

उद्दार गरिएका घाइते यात्रुहरू चार जनाको उपचारका लागि लमजुङ सामुदायिक अस्पतालमा पठाइएको उदिपुर स्थित अस्थाई प्रहरी बिटका इन्चार्ज प्रहरी हवल्दार दिपेन्द्रराज पन्तले बताउनु भयो । उहाँका अनुसार बस सडकबाट करिब एक सय मिटर तल धान खेतमा खसेको छ । उद्दार कार्य जारी रहेको छ र थप विवरण आउन बाँकी छ । बसका चालक सम्पर्क बाहिर रहेको हुँदा यात्रुको संख्या कति थियो भन्ने एकिन हुन नसकेको प्रहरी हवल्दार पन्तले जानकारी दिनु भयो । उहाँका अनुसार बसका चालकको साथै थप यात्रु भए नभएको एकिन गर्न खोजी कार्य जारी रहेको छ । 

उक्त बस उदीपुर बजारको घुम्ती कट्नासाथ धान खेतमा खसेको थियो । अँध्यारो भएका कारणले उद्धार कार्यमा कठिनाई भएको पन्तले बताउनु भयो । 

अन्य घाइतेमा बेसीशहर नगरपालिका– ४ का २८ वर्षीय मनोज गुरुङ, सोही वडाका १९ वर्षीय दिपेन्द्र गुरुङ र राइनास नगरपालिका– ९ का सुदीप नेपाली रहेको जिल्ला प्रहरी  कार्यालयका प्रमुख गंगाबहादुर थापाले बताउनु भयो । उहाँका अनुसार मनोज र सुदीपको थप उपचारका लागि पोखरामा रिफर गरिएको छ । उहाँले भन्नुभयो, ‘मृतक परियार बेसीशहर नगरपालिका– १ को धिमिरे गाउँका बासिन्दा हुन् ।