कोरोनाका कारण थप एकको मृत्यु, संक्रमित संख्या ४७४ पुग्यो

विष्णुकुमार श्रेष्ठ, व्यूरोप्रमुख, अन्तरङ्ग

लमजुङ– कोरोना भाइरस (कोभिड– १९) संक्रमणबाट यस जिल्लाका एक जनाको मृत्यु भएको छ । बेसीशहर नगरपालिका– २ लमजुङका ५६ बर्षीय पुरुषको कोरोना संक्रमणबाट पोखरामा असोज २७  गते निधन भएको हो । 

पोखरा स्वास्थ बिज्ञान प्रतिष्ठान पश्चिमाञ्चल क्षेत्रीय अस्पताल अन्तरगत कोभिड– १९ उपचार केन्द्रको आइसियुमा उपचार गराइरहेका उनको निधन भएको उक्त अस्पतालबाट जारी बिज्ञप्तिमा उल्लेख गरिएको छ । 

अस्पतालका निर्देशक सह प्रा.डा. अर्जुन आचार्यद्वारा हस्ताक्षर गरी जारी बिज्ञप्तिमा साँझ ४.२३ बजे उनको निधन भएको उल्लेख छ । विज्ञप्तिका अनुसार उनलाई असोज १८ गते आइसियूमा भर्ना गरिएको थियो । उनमा मुटु रोग, मधुमेह लगायतको रोग समेत रहेको अस्पतालको विज्ञप्तिमा भनिएको छ ।

यसअघि लमजुङको मध्यनेपाल नगरपालिका– ७ रामबजारका एक जनाको पनि पनि केही साता अघि पोखरामै उपचारको क्रममा  कोरोनाको कारण मृत्यु भएको थियो । यस प्रकार लमजुङमा कोरोनाको संक्रमणका कारण दुई जनाको निधन हुन गएको छ ।                                                 

यसैबीच, लमजुङमा आजै २९ जनामा कोरोना संक्रमण (कोभिड– १९) को पुष्टि भएको छ । लमजुङको दोर्दीखोलामा निर्माणाधिन दोर्दीखोला जलविद्युत आयोजनामा कार्यरत २४ जना पुरुष र ३ जना महिला गरी २७ जनामा संक्रमण देखिएको हो । प्रदेश जनस्वास्थ्य प्रयोगशालामा गरिएको परीक्षणबाट संक्रमण देखिएको प्रदेश स्वास्थ्य निर्देशनालयको विज्ञप्तिमा उल्लेख गरिएको छ ।

आज थप भएका संक्रमितसंगै लमजुङमा कोरोना संक्रमितको संख्या ४ सय ७४ पुगेको छ । दोर्दीखोलामा निर्माणाधीन २५ मेगावाट क्षमताको माथिल्लो दोर्दी ए जलविद्युत् आयोजनाका कामदार र कर्मचारी २७ जनामा कोरोना संक्रमण पुष्टि भएको जिल्ला प्रशासन कार्यालयले जनाएको छ । सो कार्यालयका अनुसार संक्रमित हुनेमा २४ पुरुष र तीन महिला छन् । 

आयोजनामा कार्यरत एक कामदार १० दिनअघि आएकोमा एकजना बिरामी भएपछि काठमाडौं गएर जाँच गर्दा कोरोना संक्रमण पुष्टि भएको थियो । कन्ट्याक्ट ट्रेसिङको आधारमा आयोजनामा कार्यरत कर्मचारी र कामदारको कोरोना जाँच गरिएको हो ।

उक्त आयोजनाको प्रवद्र्धक लिबर्टी इनर्जी कम्पनी लि.ले निर्माण गरिरहेको आयोजनाका कर्मचारी र पावरहाउसमा कार्यरत कामदार गरी ३० जनाको स्वाब परीक्षणका लागि स्वाव पठाइएको थियो । तीमध्ये तीन जनाको रिपोर्ट आउन बाँकी छ । 

त्यस्तै, होम क्वारेन्टिनमा बसेका सुन्दरबजार नगरपालिका– ७ का ३९ वर्षीय पुरुष र मध्यनेपालका २५ वर्षीय पुरुषमा कोरोना संक्रमण पुष्टि भएको छ । 

जिल्लामा कोरोना संक्रमितको संख्या चार सय ७४ पुगेको छ । तीमध्ये महिला एक सय १४ र पुरुष तीन सय ६० छन् । महिला ८६ र पुरुष दुई सय ९६ गरी तीन सय ८२ जना कोरोनालाई जितेर घर फर्किएका छन् । ९२ जनाको आइसोलेसनमा उपचार भइरहेको छ । तीमध्ये महिला २८ जना छन् । सबैको स्वास्थ्य अवस्था सामान्य रहेको प्रशासनले जनाएको छ ।