कोरोना संक्रमण : दोस्रो प्रकोपमा एकै दिन सर्वाधिक ५५ जनाको मृत्यु, ७,६६० जनामा नयाँ संक्रमित, पूर्वरानी कोमलको स्वास्थ्यमा सुधार

अन्तरङ्ग संवाददाता

काठमाडौं– कोरोना भाइरस(कोभिड– १९) को दोस्रो प्रकोपाबाट पछिल्लो २४ घण्टामा नेपालमा आजसम्मकै सर्वाधिक ५५ जनाको मृत्यु भएको छ । स्वास्थ्य तथा जनसंख्या मन्त्रालयले त्यस्तो पुष्टि बैशाख २१ गते गरेको हो । नेपालमा आज सबैभन्दा बढी संक्रमित फेला परेका हुन् । 

यसैगरी, सो अवधिमा थप सात हजार ६६० जनामा संक्रमित भएका छन् । अघिल्लो दिन देशभर  ७४४८ जनामा संक्रमण पुष्टि भएको थियो ।  बितेको २४ घण्टामा पीसीआर विधिबाट १६ हजार १३१ जनाको परीक्षण गर्दा ७ हजार ५८७ जनामा संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ । एन्टिजेन विधिबाट ५७१ जनाको परीक्षण गर्दा ७३ जनामा संक्रमण पुष्टि भएको छ । 

यो तथ्यांकसँगै देशभर कोरोना संक्रमितको कुल संख्या ३ लाख ५१ हजार ५ पुगेको छ । त्यस्तै, कोरोना जित्नेको संख्या २ लाख ८७ हजार ७९० पुगेको जनसंख्या मन्त्रालयले जनाएको छ । मन्त्रालयका अनुसार मृतकको कुल संख्या ३ हजार ४१७ पुगेको छ । 

यसैबीच, पछिल्लो २४ घण्टामा काठमाडौंमा मात्रै २७७९ जनामा कोरोना भाइरस संक्रमण पुष्टि भएको छ । मन्त्रालयका अनुसार भक्तपुरमा ५१३ र ललितपुरमा ६०१ जनामा संक्रमण पुष्टि भएको हो । 

यसैगरी, गत २४ घण्टामा एक हजार ७ सय ७५ जना  उपचारपछि डिस्चार्ज भएका छन् । योसँगै निको हुनेको संक्रमितको संख्या २ लाख ८७ हजार ७ सय ९० पुगेको मन्त्रालयले जनाएको छ ।

 पूर्वरानी कोमल शाहको स्वास्थ्य सुधार 

यसैबीच, कोभिड– १९ बाट पीडित पूर्वरानी कोमल राज्यलक्ष्मी देवी शाहको स्वास्थ्य स्थितिमा सुधारको क्रम जारी रहेको छ । यस्तो भएसँगै अब उहाँलाई सघन उपचार केन्द्रबाट क्याबिनमा सारिने भएको नर्भिक अस्पताल स्रोतले जनाएको छ । उक्त स्र्रोतका अनुसार पूर्वरानीको स्वास्थ्यमा सुधारसँगै सामान्य हिँडडुल र खानामा रुचि बढेको छ । त्योसँगै अब सघन उपचार आवश्यक नरहने आंकलन गरिएको हो । अस्पतालद्वारा उहाँको स्वास्थ्यमा सुधारको क्रम यस्तै रहेमा उहाँलाई भोलि बैशाख २२ गते क्याबिन सारिने उल्लेख गरेको छ ।

भारतको १० दिन बसाइबाट स्वदेश फर्केपछि कोरोना संक्रमण भएका पूर्वराजा ज्ञानेन्द्र शाह, पूर्वरानी कोमल राज्यलक्ष्मी देवी शाह र छोरी प्रेरणा विगत ११ दिनदेखि नर्भिक अस्पतालमा उपचार भइरहेको छ । 

पूर्वरानीमा अक्सिजन स्याचुरेसन कम देखिएपछि आइसियुमा राखेर दैनिक १० लिटरसम्म अक्सिजन उहाँलाई दिइएको थियो । पूर्वराजा शाह तथा छोरी प्रेरणाको स्वास्थ्यमा सन्तोषजनक सुधार आएको पनि अस्पतालले जनाएको छ ।

भारतमा  संक्रमितको संख्या लगातार घट्दो क्रममा

उता, नयाँ दिल्लीबाट प्राप्त समाचार अनुसार भारतमा पछिल्ला तीन दिनसम्म कोरोना भाइरसबाट संक्रमितको संख्या लगातार घट्दो क्रममा छ । पछिल्ला तीन दिनको तथ्यांकमा नयाँ संक्रमितको संख्या लगातार घटेको भारतको स्वास्थ्य तथा परिवार कल्याण मन्त्रालयले जनाएको हो । सो मन्त्रालयका अनुसार बैशाख १८ गतेका दिन नयाँ संक्रमितको संख्या दैनिक चार लाख एक हजार ९९३ थियो । त्यो संख्या त्यसयता निरन्तर घट्दो क्रममा छ । १९ गतेका दिन तीन लाख ९२ हजार, २० गते तीन लाख ६८ र २१ गतेका दिन तीन लाख ५७ हजार जनामा संक्रमण झरेको बताइएको छ ।

कोरोनाको दोस्रो प्रकोपबाट सबैभन्दा बढी प्रभावित महाराष्ट्र, दिल्लीलगायत राज्य भएका हुन् । पछिल्ला केही दिनयता ती सबै स्थानमा कोरोना संक्रमितको संख्या घटेको छ । भारतमा कोरोनाका दैनिक नयाँ संक्रमितको संख्या उच्च विन्दुमा पुग्दाको दिन बैशाख १८ गते महाराष्ट्रमा ६३ हजार संक्रमित भेटिएका थिए । यो संख्या २१ गतेका दिन ४८ हजारमा झरेको छ ।

राजधानी दिल्लीमा १८ गते २५ हजारभन्दा धेरै संक्रमित भेटिएका थिए तर त्यो संख्या २१ गते आइपुग्दा १८ हजारमा झरेको छ । उत्तर प्रदेशमा भने कोरोना संक्रमणको अवस्था स्थिर जस्तै देखिन आएको छ । १८ गते ३० हजार संक्रमित पुष्टि भएकोमा २१ गतेका दिन २९ हजार फेला परेका छन् ।

संक्रमणका कारण हुने गरेको मृत्यु संख्या बढ्ने÷घट्ने क्रम चलिरहेको छ । भारतमा १८ गते तीन हजार ५२३ जनाको मृत्यु भएको थियो भने २१ गते भने त्यो संख्या तीन हजार ४४९ रहेको छ ।++