दोर्दी गाउँपालिकास्तरीय रनिङ शिल्डको उपाधि गत वर्षकै विजेता लक्ष्मी माविले हत्यायो

अन्तरङ्ग संवाददाता

लमजुङ– लमजुङको दोर्दी गाउँपालिकामा सञ्चालन गरिएको तेस्रो राष्ट्रपति रनिङ शिल्ड प्रतियोगिताको उपाधी गत वर्षकै विजेता लक्ष्मी मा.वि. श्रीमञ्ज्याङले जितेको छ । कुल २८ वटा स्वर्ण पदकका बीच गराइएको उक्त प्रतियोगितामा ९ स्वर्ण पदक जितेर लक्ष्मी माविले उपाधि हासिल गर्न सफल भएको हो । 

दोर्दी गाउँपालिका– ४ स्थित पालिकाको खेलमैदानमा सञ्चालन गरिएको तेस्रो राष्ट्रपति रनिङ शिल्ड प्रतियोगितामा ९ स्वर्णपदक, रजत र कास्यपदक ७÷७ सहित लक्ष्मी माविले उपाधि जित्न सफल भएको हो । पाचोक मावि पाचोकले ५ स्वर्णपदक, ३ रजतपदक र ४ कास्यपदकका साथ द्वितीय भएको सो प्रतियोगिताको आयोजक दोर्दी गाउँपालिकाको शिक्षा शाखाका प्रमुख भीमप्रसाद लामिछानेले बताउनु भयो । उहाँका अनुसार ४ स्वर्णपदक, ८ रजतपदक जितेर चैतन्यदय सत्य मावि नौथर तृतीय भएको छ ।

प्रतियोगितामा प्रथम, द्वितीय र तृतीय स्थान हासिल गर्ने विद्यालयहरूलाई क्रमशः ५ हजार रुपैयाँ, शिल्ड, मेडल र प्रमाणपत्र, ३ हजार रुपैयाँ, मेडल र प्रमाणपत्र र तृतीयलाई २ हजार रुपैयाँ, मेडल र प्रमाणपत्र प्रदान गरिएको दोर्दी गाउँपालिकाका उपाध्यक्ष दिल घलेले बताउनु भयो । उहाँका अनुसार प्रतियोगितामा गाउँपालिकामा रहेका ८ वटा मा. वि.ले भाग लिएका थिए । प्रतियोगिता १४ विधामा सञ्चालन गरिएको थियोे । 

सटफुट, ज्याबलिङ थ्रो, लङ जम्प, त्रिपल जम्प, हाई जम्प, १००, २००, ४००, ८००, १ हजार ५०० र ३ हजार मिटरको दौड, १०० इन्टु ४ रिले, ४०० इन्टु ४ रिले, भलिबल प्रतियोगिता सञ्चालन गरिएको पालिकाको शिक्षा शाखाका प्रमुख लामिछानेले बताउनु भयो । उहाँका अनुसार बिजयी विद्यालयलाई दोर्दी गाउँपालिका अध्यक्ष ओमबहादुर गुरुङ, उपाध्यक्ष दिलबहादुर घले, प्रशिक्षक सितमराज गुरुङ र तोकबहादुर गुरुङले संयुक्त रुपमा पुरस्कार र प्रमाणपत्र वितरण गर्नु भयो । सो अवसरमा प्रतियोगितामा सहभागि विद्यालयका व्यवस्थापन समितिका अध्यक्ष, प्रधानाध्यापक तथा खेलकुद शिक्षहरूको सहभागिता थियो ।  

उक्त प्रतियोगिताको उदघाटन संघीय संसदका सदस्य देवप्रसाद गुरुङले गर्नु भएको थियो भने गाउँपालिकाका अध्यक्ष ओमबहादुर गुरुङको अध्यक्षतामा उक्त कार्यक्रम गरिएको थियो । उदघाटन कार्यक्रमको सञ्चालन पालिकाका सूचना अधिकारी धर्म गुरुङले र समापनमा गाउँपालिकाको शिक्षा शाखाका प्रमुख भीमप्रसाद लामिछानेले गर्नु भएको थियो । 

उक्त प्रतियोगितामा जयदेव माविले एउटा पनि स्वर्ण र रजत पदक जित्न सकेन भने कास्य ५ वटा जितेको थियो । त्यस्तै,  पहिलो वर्षको विजेता फलेनी माविले स्वर्ण चार रजत एक र कास्य पदक ७ वटा जितेर चौथो भएको थियो । यसैगरी, बाल कल्याण माविले एक मात्र स्वर्ण पदक जित्यो भने ५ रजत पदक जितेको थियो । उसले कास्य पदक कुनै जितेन । स्वर्ण पदक दुई र रजत तथा कास्य ३÷३ पदक लक्ष्मीनारायण माविले जितेको थियो भने सूयोदय माविले तीन स्वर्ण, रजत र कास्य २÷२ पदक जित्न सफल भएको थियो । 

स्मरणीय छ, गतबर्ष पनि राष्ट्रपति रनिङ शिल्डको उपाधी लक्ष्मी मावि श्रीमञ्ज्याङले नै जितेको थियो । त्यसअघिको बर्ष फलेनी मा.वि.ले सो उपाधी जितेको थियो ।