नवराज पहाडी
लमजुङ । लमजुङकी लोकप्रिय एवम् अग्रज लोकगायिका माया गुरुङलाई एविसी टेलिभिजनको ईन्द्रेणी कार्यक्रमद्वारा मासिक १० हजार दिने घोषणा गरेको छ । गुरुङलाई सामाजिक सुरक्षा भत्ता सहर उक्त रकम बाँचुञ्जेल दिइने भएको हो ।
ईन्द्रणीका सञ्चालक कृष्ण कँडेल सहितको टोलीले अग्रज लोकगायिका माया गुरुङको घरमै पुगरे एक कार्यक्रमको आयोजना गरी उक्त सहयोगको घोषणा गरेको हो । कोभिड- १९ को संक्रमणको अस्वस्थाले सभा/समारोह गर्ने खालको समय नभएको र वर्षायाम समेत भएका कारण ईन्द्रेणीको टोलीले माया गुरुङको घरमै पुगेर एकमुष्ट ५० हजार समेत सहयोग गरेको छ । उक्त सहयोग रकम प्रमुख जिल्ला अधिकारी कृष्णप्रसाद शर्माले माया गुरूङलाई हस्तान्तरण गरेका हुन् ।
लमजुङको बेसीशहर नगरपालिका-ं ५ नाल्माबेसीमा स्थायी बसोबास भएकी माया गुरुङले सानैदेखि लोकगीतका क्षेत्रमा पाइला चाल्दै आएकी हुन् । उनले ‘गाउँशहरमा लमजुङ दरबार, मायालाई दिने थिए फूलजस्तो जोवन, भइसक्यो मेरो घरबार ... ’ बोलको गीत गाएर विसं २०४५ सालमा रेडियो नेपालले आयोजना गरेको राष्ट्रव्यापी लोकगीत प्रतियोगितामा लमजुङका माया गुरुङ र उमा गुरुङको जोडी पहिलो भएको थियो । माया गुरुङलाई २०४५ को ‘नेपाल तारा’का रुपमा समेत चिनिएकी हुन् । उनले १ सय ३५ भन्दा बढी विभिन्न किसिमका लोक गीत गाएर रेकर्ड गराएको बताएकी छन् । घरायसी अवस्था कमजोर भएको हुँदा उनको प्रतिभाले उचितमात्रामा मौलाउने मौका नपाएको उनी नजिकका लोकगीतका पारखीहरू बताउँछन् । माया गुरुङ हिजोआज पनि आफैले उत्पादन गरेको केरा डोकोमा बोकेर, बेच्ने, कुखुरा पाल्ले बंगुरु तथा बाख्रा पालन गरेर आफू, श्रीमान् तथा छोराछोरी पाल्दै आउनु भएको छ । मायाका श्रीमान्लाई उनका बुबाले दिनु पर्ने अंशभाग नदिएको कारणले मायाको अवस्था दयनीय हुन गएको हो । मायाले बुबा कायम गरी श्रीमान्को नागरिकता निकाल्नका लागि पनि बर्षौंसम्म कष्ट गर्नु पर्यो । अन्ततः एक प्रजिअको सल्लाहमा जिल्ला अदालतमा मुद्दा गरेपछि उनीहरूका नाता कायम भएको हो, नाता त कायम भयो अंश भने अझै मिलेको छैन ।
अहिलेको समयमा माया गुरुङको गीत संगीत ओझेलमा परेकाले उनको सिर्जनालाई जोगाउन तथा निरन्तरता दिन इन्द्रेणीको टोली माया गुरुङको घरसम्मै पुगेर सहयोगको घाषणा गरेको ईन्द्रणीका सञ्चालक कृष्ण कडेलले बताए । उनले भने, ‘माया गुरुङको सिर्जनालाई जोगाउन तथा हराएर जान नदिई निरन्तरताको लागि ईन्द्रणी कायक्रमले मासिक रुपमा १० हजार रुपैया प्रदान बाचुन्जेल सामाजिकसुरक्षा भत्ता(पेन्सन) स्वरुप प्रदान गरिने छ ।’
ईन्द्रणी कार्यक्रममा सञ्चालक कृष्ण कँडेलले माया गुरुङलाई ५० हजार एकमुष्ट रकम हस्तान्तरण गर्दै माया गुरुङलाई थप हौसाला प्रदान गर्दै सिर्जना(गीत र लोकभाका)को संरक्षण गर्नुपर्नेमा जोड दिए ।
सो अवसरमा लोकगायिका माया गुरुङले ईन्द्रणीका सञ्चालक कृष्ण कँडेललाई आफ्नो कर्मको पिता मान्ने बताइन् । उनले भनिन् ‘कृष्ण भाइको यो गुण म जीवनभर भुल्ने छैन ।’ माया गुरुङले आफूले जीवनमा भोगेका भोगाईलाई गीतमार्फत प्रस्तुत गर्दा कार्यक्रमका सहभागीहरू भावविह्वल हुँदै निस्तब्ध सुनिरहेका थिए ।
No comments:
Post a Comment