भरत हरिजन 'प्रकृति'को कविता 'यात्रा राजमार्गको'

यात्रा राजमार्गको (कविता)

                      - भरत हरिजन 'प्रकृति'

जीन्दगी रोकिदै चल्दै गर्‍यो

राजमार्गको बाटो हुदै निरन्तर जस्तै ।

मानो कहिल्यै सकिएन

पाथी कहिल्यै भरिएन

सधैँ ख़ाली जस्तै रह्यो

कहिले सरकार बिग्रियो

कहिले इन्जिन बिग्रियो

कहिले मन बिग्रियो

कहिले घरबर बिग्रियो ।

जिन्दगी कहिल्यै सप्रिएन

देश कहिल्यै बद्लिएन

र त यी यात्राहरु दुर उस्तै छन्

छाकहरु किस्ताबन्दीमा टारिरहे

दु:खहरु गुणात्मक बढिरहे

सुखहरु सपनामै टिकिरहे

समयलाई कहिल्यै नकार्न सकिएन

कहिले दु:ख सुख साट्दै हिँड्ने

खलाँसी बनायो यही समयले

कहिले कैयन जिन्दगीलाई

स्टेरिङको भरमा कुदाउने

डाइभर बनायो यही समयले

जीवन समयको ख़िलाफमै बित्यो

कसैको सुनुवाइ र इजलासमा बित्यो

राजमार्गहरुमा कतिकति क्लज, एक्सीलेटर र ब्रेक दबइयो होला

कतिकति गियर फेरियो होला

तर जीवन मात्र जिउन सकेँ

जिन्दगीको न कुनै क्लज दाब्न पाएँ

न कुनै एक्सिलेटर र ब्रेक नै दाब्न पाएँ

न कुनै गियरको भरमा कुदाउन नै सकेँ

अझै खुसी खोजिरहेछु राजमार्गहरुमा

कैयनको विकसित भरिया भएर ।।।

हालः अष्ट्रेलिया